Johannesburg – Kitstoetse vir dwelms kan
misleidende uitslae oplewer en behoort nooit sonder bevestiging in die
werkplek of skole gebruik te word om mense te tug nie.
Dit is
omdat antiretrovirale medisyne (ARM), sekere verkouemiddels en selfs
groot hoeveelhede papawersaad misleidende toetsuitslae kan oplewer wat
mense verkeerdelik as dwelmgebruikers kan identifiseer.
So het wetenskaplikes van die forensiese toksikologie-laboratorium van die Universiteit van Pretoria se chemie-
departement dié week by ’n seminaar oor dwelmtoetse in die werkplek gesê.
Adriaan
Marais het gesê ’n hele lys middels kan vals positiewe uitslae oplewer,
onder meer die ARM Efavirenz en medisyne met kodeïen.
Sommige
koppie- of strokietoetse is geneig tot kruistoetsing wanneer die
metaboliet van die dwelms en dié van medisyne verwar word.
Tim
Laurens, direkteur van die laboratorium, was betrokke by ’n studie
waarby 30 mense wat Efavirenz gebruik, betrek is. Hul uriene is met twee
verskillende soorte toetsstrokies getoets vir die metaboliet van THC,
die aktiewe bestanddeel in dagga.
’n Meer gevorderde
laboratoriumtoets, gaschromatografie-massaspektrometrie (GC-MS), het
getoon nie een van die deelnemers het dagga gebruik nie.
Met die kitstoetse is 28 van die 30 mense wel positief getoets sonder dat hulle dagga gebruik het.
Dit
is waarskynlik omdat die Efavirenz-metaboliet ’n soortgelyke molekulêre
vorm as die dagga-metaboliet het en goedkoper toetse nie selektief
genoeg is om die twee te onderskei nie.
Volgens Marais is bevind
iemand kan positief getoets word vir opiate 24 uur nadat hy 12 g
papawersaad geëet het. Die kodeïen in verkouemiddels kan ook
verkeerdelik aangedui word as heroïen.
Die uitslae van kitstoetse kan net as voorlopig beskou word en moet bevestig word, het Marais en Laurens gesê.
– Volg
Nuus24 op Twitter.
